اشعار ترکی و فارسی

مجازی دونیادا هرنه مجازی
سالامدا مجازی علیک مجازی
یازمالار مجازی پؤزما مجازی
آغلاماق مجازی گولمک مجازی

بوگوندن صاباحا اعتبار یؤخدو
سن وارسان سؤروسان کیمسه وار یؤخدو
کیم کیمدن اوتانیمیر حیا آر یؤخدو
گئتمکلر مجازی  گئلمک مجازی

تک توک آداملارین نام نیشانی وار
مجازی دونیاد شؤهرت شأنی وار
اولدوزلارا گؤیو کهکشانی وار
پارلاماق مجازی سؤنمک مجازی

چؤخلاری یؤلداشدی چؤخلاری قارداش
دردلشیب مجازی اولوللا سیرداش
دوشمان هردن آتیر مجازی بیر داش
سئومکلر مجازی سؤیمک مجازی

یازیلار صوحبتلر بوتون سندسیز
هامی نابئلددی بوتون بیلدسیز
مجازی دونیادی اولماز قلط سیز
تره زی  مجازی  الک مجازی

اومودام مجازی یازسام اوزانار
یالاندان مجازی مقام قازانار
حاق آنمازا سن مجازی یاز آنار
بیلمه مک مجازی بیلمک مجازی

اومود  زنگانلی

باخیشین گؤزمون اؤنونه سرمه
باخیرام اولورم باخمیرام اولمور
ماوی بیر ده نیزدی درین گؤزلرین
دالیرام  اولورم  دالمیرام اولمور

لنگر سالیب ساحیلینده گئمیلر
عکس اولوب اوزونده یاشیل زئمیلر
سنله منی بیر گؤرنده عمیلر
قالیرام اولورم قالمیرام اولمور

وئردیین سؤزلری گؤورد گؤزه لیم
گؤزلریمی چیخاردمامیش اؤزه لیم
سندن اوموب عشقی سونوم ازلیم
اومورام اولورم اوممورام اولمور

هرگون باخیشینلا اومودوم آرتیر
دردیمه درماندیر یؤخلوغو دارتیر
مؤژگانلارین ویریر قلبیمه یار تیر
اولورام اولورم  اولمورام اولمور

اومود زنگانلی

الیمی الیندن اوزه بیلمیرم
قارلی قیش اولسامدا آیریلما مندن
سن یازا دون ائتکلری یاشیللا
گئتمه سم قالسامدا آیریلما مندن

منه اوجالیغدی سنین وارلیغین
یادینلا زیروه ده کولک قارلیغین
گره ییمدیر یاردیملغین یارلیغین
یئل طوفان سالسامدا آیریلما مندن

یای پاییز ایستیر آیریلیق سالا
قیش یازدان آیرلا گول چیچک سؤلا
سئوگی سئوگسیندن آرالی قالا
ناچار آزالسامدا آیریلما مندن

سن بئزه لالادان یال یاماجلاری
آرخالان داغلارا گئز آرخاجلاری
 سندن نفس آلسین سرو آغاجلاری
من درده دالسامدا آیریلما مندن

اومودام یاشیرام تک سنه خاطیر
اووجودا قالیرام تک سنه خاطیر
منسیزلیگی سئومه تک منه خاطیر
قارسیز قارالسامدا آیریلما مندن

اومود زنگانلی

قاراداغدان منی سئسلیر
زیروه لرده قالان بیر سئس
اوره ییمدن خبر وئریر
گیزلین وولکان اولان بیر سئس

یانار اود وار نفه سینده
قاراداغین سینه سینده
قیزیل آذر كوره سینده
اولوودان باج آلان بیر سئس

داغلار اوجالیب داغ اولوب
قارا ساچلاری آغ اولوب
ائته ییی باغچا باغ اولوب
گلیر زیل بم چالان بیر سئس

او سئس اومودون سئسی دیر
حیسسی خالقین حیسئسه سی دیر
قالخان جرس جوره سی دیر
ائلده های هوی سالان بیر سئس

اومود زنگانلی